قصيدة : ياهو، يامن لاهوَإلاَّ ُهُوّْ
سبحان من قضى واحكم وعلم الإنسان من لايعلم
قصيدة : ياهو، يامن لاهوَإلاَّ ُهُوّْ
نظم : الحاج احمد سهوم
مرمة: المبيت الرباعي
قياس: لميمة : لعبد المجيد وهبي
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
ياهُوَ، ياحيّْ، ياقَيُّومْ عْلى مَالَهْ
فَ:سْفَلْ كُونُ وَعْلاهْ
لَشْعارْ الِْقَلْبْ مْلاها
باحتْ..لاحَتْ..فا حْتْ اُوتْلاحْ عْلِيَّ شَمْلالْها
باحَتْ لِيَّ بَوْحْ كانْ قَلْبي حاضَرْ وَمْلاهْ
هَذْ الْقَلْبْ آمَغْلاهْ
يَمْلاءاته لَوْلاَها
ما شاهَدْ وَلِى كْـلَمْتْ "هوَ" وَدْهَلْ فَ جْلالْها
لاَحَتْ كَ: الْوَميضْ فَ: الْحْلاكْ تْبارَكْ وَللَّاهْ
وَالْقَلْبْ الْقى لَيْلاهْ
لَيْلاَهْ اُو هُوَ لَـها
شامْ سْناها شَمّْ طيبْها وَتْرَشّْ ابْشَلاَّلْها
ساعَتْ لاَحَتْ فاحْتْ اُو الطَّييْبْ عْبَقْ لَعْلاهْ
كيفْ اَنا نَسْتَحْلاهْ
اجْميعْ الْأَرْضْ مْلاها
بوطاها وَجْبالْها وْبَ: الْأَهَلْ أَوْطَالْها
خَفّْ مْنَ الرَّمْشة ذْ عَيْنْ لوقِيَّتْ ذ التُّولاَهْ
وَخْلا عَقْلي وَجْلاَهْ
هَلْ لَعْياني هَلْ لَّها
مَنْ نَظْراتْ اخْرينْ لَ:اللّْوامَعْ وَتْكونْ قْبالْها
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
حَتْجَبْ عَللّْ لَعْْقولْ مَنْ كْثَرْتْ ظْهورُه فَ سْماهْ
وَالْبَحْرْ اُو ما في مَاهْ
وَالْأَرْضْ فْ حالْ ضْماها
يَرْويها هيَ وْناسْها.. وَشْجَرْها وَنْعامْها
يامَنْ مَخْتَفي عْلى عْقولْ عْبيدُه وِيمَاهْ
بَ: نْوارْ ضْيَا حِماهْ
سايَرْ لَعْقولْ طْماها
الظَّاهِرْ فْ: ما نْشا الْباطِنْ فْ: شوفْ نْيامْها
يامَنْ هُوْ اللُّوّْلْ اُو الَّلا خَرْ لَعْقَلْ مَعْماهْ
عَلّْ لاَسْمْ اُو مُسَمَّاهْ
والرُّوحْ الشَّوْقْ غْماها
والنَّفْسْ فْ:عَتْمة اللّي نْشاها يَجْلي تَعْتامْها
قاصَدْ ابْ اللَّـهْ فَ: الضّْيا ذَ الْحَمْد ُلَلَّـهْ
والزَّادْ ف: شُكْري لَهْ
ذاتي هُوَ مولاها
هُوَ ناشَأْها وْمَنْ النَّشْأَ عالَمْ بَمْأَلْها
رَدتّْ نْعَدّْ جْميعْ هَلّْ الْيَسْلامْ وْلايْ اللَّهْ
وَنْكَثَّرْ شانْ اللهْ
وَمَنْ الدَّنْيا وَ بْلاها
انْقَلَّعْ بَ: النَّفْسْ لاتْعاوَدْ تُوحَلْ فُ وْحالْها
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
صفاتْ الإِيجابة شَرْكْتْ حْظوظْ النَّفْسْ مْعاهْ
وَحْظوظْ النَّفْسْ مْعاهْ
هي في ذَكْرُه عاهَة
اُوفَ: طْريقْ السَّالْكينْ مَعْدودَة مَنْ قُطَّاعْها
ذاكَرْ ب:الرَّحيمْ نِيْتْ الرَّحْمة في مَسْعاهْ
وَعْلى الرَّحْمة يسْعاهْ
اُوحَظّْ النَّفْسْ مْعاها
اوْذَاكَرْ بَ: الْوَهَّا فَ: الْيْهابة نَفْسُه تَمْتاعْها
وَكْذاكْ التَّوَّابْ..اُو الْغَفَّارْ..الْلأَمْرْ وْعاهْ
قالْ قْليبي وَرْعاهْ
لاَ ماها لاَ مَرْعاها
كُلّْ حْظوظْ النَّفْسْ فَ: ذّْكَرْ، بْداهْ بْتُوداعْها
تَوْحيدْ الْيَخْلاصْ..وَاصّْفا..وَالصَّدْقْ آمَعْلاهْ
لاشي غيرُه يَعْلاهْ
اوْقَوْلَتْ "هُوَ" عَلاَّها
غَيْبْ الغَيْبْ اللّي خْفضى عْلِها وَعْلى قُوالْها
" يا هُوَ" ذَكْرى وْ مَنْ ذْكُرْ بِها لَعَـلاَّهْ
حالْ الضَّدِّينْ مْلاَهْ
مَنْ لَشْواقْ الْوَلاَّهَا
نَلْجْ اُونارْ ..اُوضَيّْ وَدّْجى .. وَخْصَبْها وَقْحالْها
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
زَنَّدْ نارْ الجُّوفْ شَوْقْ لَ:عْراصي ضَيّْ سْناهْ
وَالْقَلْبْ الشَّوْقْ ضْناهْ
وَالرُّوحْ الشَّوْقْ فْناها
مَشْتاقينْ انْوِيوْرة ذْعَرْصَة مَنْ نورْ فْنانْها
شَدّْ نواعْ الصَّبْرْ فَ: الصّْبَرْ عَنٌّه كيفْ عْناهْ
لَ: الشَّبْلي وَتْمَعْناهْ
رَجَلْ نَفْسُه عَنَّاها
بَ:الصَّلا والصَّوْمْ كُلّْ مَنْ عَنَّى نَفْسُه عانْها
هاهِيَ تَذْكِرْتي بْ:"هُوَ" مَنْ لاَنَسْلاهْ
هُوَ صُنْعُه جَـلاَّهْ
صُنْعُه نَفْسي خَلاَّها
جَدْبانَة وَمْحَيّْرة وْلاَعارَفْ عَقْلي مالْها
ياهُوَ فَرِّيتْ مَنَّكْ لْ: عَنْدَكْ واللّي لَـهْ
هُوَ بَ:جْلاَلُه لاَهْ
يَقْصَدْ غيرُ؟ بَلاَهة
يَهْرَبْ مَنُّه ليهْ وْيسْتَحْرَمْ لَلنَّفْسْ وْلاَلْها
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
أنايا أللَّهْ عَبْدْ فْ: عْبادَكْ قَلّْ جْداهْ
وَالشَّيْطانْ تْحَدَّاهْ
خَطْوة م يَتْعَدَّاها
فَ: سْلوكْ الطَّريقْ. خَيّْبُه وَ طْوي لي تَمْدادْها
زَﯕْتْ فْ:مِشْكاتْ نّْوارْ قَهْرُه تَبَّتْ يَداهْ
ما يَكْمَلْ كيدْ بْداهْ
حَصَّنْ نَفْسي بَهْداها
وْعَرَّفْها بَدْسايْسُه تْشَيَّدْ قَلْعَة لَمْلادْها ذ
ها شَمْلة ذَ الصُّوفْ سوسْديها قَلْبي سَدَّاهْ
وَنْسَجْتُه كي سَدَّاهْ
جاتْ الطَّعْمة وَسْداها
فَ:بْياضْ الشُّروقْ لاَالْوانْ اِيصَبْغوا عَسْجادْها
مَسْكْ خْتامْ الْقَوْلْ لاَ إلاهَ إلاَّ اللَّـــهْ
طَــهَ رَسولْ اللَّـهْ
يومْ إِيقولْ آنالَها
يَتْزَمَّمْ فَ:زْمامْ شّْفاعة أسْمي وانَّالْها
قالْ احْمَدْ سهومْ يامنْ الْمَلحونْ اسْتَحْلاهْ
اُو رَدَّدْ: "يامَحْلاهْ"
ها جُمَّانة مَغْلاها
غَصْتْ لْها فَ: غْوارْ عُمْقْ خُلْجانْ اللانَقْوالْها
ياهُوّْ الَّا هُوّْ غيرْ هُوَ ربّْ اُو إلاهْ
وَلا شريكَ لَـهْ
سايَرْ لَعْقولْ وْلاَها
بَ: الْحاضَرْ في - يا- وْغايَبْ فْ: - هُ- حُكَّلْها والْهة
